وحشتنا ياخال

وحشتنـــا ياخــــال

ــــــــــــــــــــــــــــــــــــــــــ

سنة بحالها عدّت على رحيل الخال  عبد الرحمن الأبنودى .. مع أنه لم يرحل إلا بجسده .. لكن نبضاته تطل علينا بأستمرار، وفى كل المناسبات ،والأزمات من داخل أحرف كلماته ..

أحترت أنشر لكم أيه من قصايده النهاردة  .. ( آمنه ) .. ولا

(حراجى القط ) .. ولا ( الميدان ) .. ولا  .. ولا  .. ولا  .. ولأنى عارف أنكم من السهل جدا تجيبوا قصايده ،بصوته، أو مكتوبة من النت  اللى مليان بأنفاسه .. فقلت أشارك فى ذكراه  ببعض أبيات مختارة من أشعاره .. بس  علشان أقوله .. وحشتنا ياخال .ــــــــــــــــ

ما اجمل نومه على كتوف اصحابك

تنظر صادقك من كدابك

تبحث عن صاحب انبل وش

فى الزمن الغش

***

انتوا بعتوا الارض بفاسها
بناسها
في ميدان الدنيا ..فكيتوا لباسها
بانت وش وضهر
بطن وصدر
والريحه سبقت طلعه انفاسها
واحنا ولاد الكلب الشعب
احنا بتوع الاجمل وطريقه الصعب
والضرب ببوز الجزمه وبسن الكعب
والموت فى الحرب
لكن انتم خلقكم سيد الملك
جاهزين للملك
ايديكم نعمت من طول ما بتفتل ليالينا الحلك
احنا الهلك وانت الترك
سواها بحكمته صاحب الملك

****

أنا السابح بمسبحتي.. 
ومبخرتي.. 
وتوبي الخيش.. 
أغنيلك.. 
وأموّلك مواويلك.. 
ماتسمعنيش.. 
ولا تشوفينيش.. 
ومش لازم..ما دام عايشة.. 
ما دمت بعيش..

*****

واحنا اتْخَلقْنا عشان نِضَايقْهُم
يا يِفْهموا الأوطان.. يا ينزاحوا
حَشَرْنا ربَّك لُقمة فى زُورهم
يا يريَّحونا.. يا مِش حيرتاحوا!!
*****
ومصر.. رِجليها حِفْيِتْ
وتانى.. رِجْعِت تِعانى
الثورة وِلْعِت وِطِفْيت
رِجْعِت «نظام حُكم» تانى!!

*****
والدنيا فيها نفوس ونفوس
ناس حرة ناس شايلة سِجْنها
أُم الشهيد مش طالبة فلوس
طالبة دِم اللى قتلوا ابنها!!

*****

رحمك الله وغفر لك ياخال .. وجزاك خيرا  بقدر ماأمتعتنا .. ودفعتنا  لعشق الحروف .. بقدر ماعشقتها .. وقد سكنتك  عشقا لك  كما عشقتها .