ريمه حالفة ماترجع لعاداتها القديمة !!
ــــــــــــــــــــــــــــــــــــــــــــــــــــــــــــــــــــــــــــــــــــــــــــ
الكلام اللى حا اٌقولهلكوا ده من
جوه المطبخ ، ويمكن ماتشوقهوش فى أى مكان تانى!!
رؤساء تحرير بعض الصحف تنتهى مدة رئاستهم قريبا .. والمفروض أن يكون
قد صدر قانون الصحافة .. ولأنهم كسلانين .. ومصلحجية .. والكل خايف من الحرية
والديمقراطية ،وعايز يبقى زى ماهو .. بس يتمنّظروا ، وينظّروا على خلق الله ..فلم
يصدر القانون اللى أتخوتنا بيه ، لغاية دلوقت .. وإمبارح طلع علينا مصطفى بكرى
بأقتراح أن يقوم الرئيس السيسى بتعيين رؤساء الصحف .. وبكده يتحكم الرئيس فى الصحف
والرأى العام .. وبعدها الأعلام طبعا ..وترجع ريمه لعادتها القديمة .. وأنا مش
بأشكك فى السيسى طبعا .. لكن السيسى فاضلله كام سنة وتنتهى المدتين بتوعه حسب
الدستور .. ومش عارفين مين اللى جاى بعده .. يبقى لازم من دلوقت نبص للأمام مش تحت
رجلينا كالعادة ، لغاية ماحاننكفى على وشوشنا !!
لأن لو رئيس الدولة تملك سلطة تعيين رؤساء التحرير .. يبقى حانرجع تانى
جرايد وصحف مطبلاتيه للحكومة!! مهما عملت ومهما أخطأت .. لأن كل رؤساء التحرير
اللى قاعدين على الكراسى حايخافوا أحسن تنسحب الكراسى من تحتهم !! .. والصحفيين
الواقفين فى الصفوف الطويلة علشان يقعدوا على نفس الكرسى حايخافوا يعترضوا على حاجة !! أحسن مايتمش
أختيارهم ، وينولوا شرف قعدة الكرسى .
المهم بقى أن الصحفيين من إمبارح وهمه مختلفين ومنقسمين .. والأغلبية بتدور
على مصالحها فين ،وبتحاول تميّل الكفة
ناحية مصالحها .. والأقلية جدا من المخلصين محتاسين ،ومحتارين وسط الوحوش ،ولعبة المصالح
اللى بتحصل .. والأغلبية شايفة نورتاية كبيرة جاية فى السكة .. وكل واحد
عايز يلحقلله حتة كبيرة منها .. والبعض عايز يلهف التورتاية كلها لوحده .. حتى
اللى عندهم مرض السكر ، برضه مش هاممهم
وبيلهثوا علشان يلحسوا وياكلوا التورتاية كلها ، وبعدين ياخدولهم حقنتين أنسولين مش مشكلة !! لكن الأقللية الشريفة من الصحفيين اللى فعلا خايفين على مصر ،ومستقبل الحرية ،والديمقراطية
اللى طلع عنينا علشانهم ، لازم يمشى فى
طريقه اللى رسمناه .. وأنا بلا فخر واحد
من هذه الأقلية .. والحق أحق أن يُتبع
بكده يبقى أقتراحك مرفوض جملة وتفصيلا ياعم بكرى .. وياريت نفضل على مسار وطريق
الحرية اللى بدأناه ، ومامشيناش فيه غير خطوات صغيرة .. وناس كتيرة عايزة ترجعنا
لورا تانى .. بس وحياة أبوكم ماحانرجع ..
والحق أحق أن يُتبع .
بقلـــــــــم
صـــــلاح إدريـــــس
تم نشر المقال بجريدة الوطن عدد الخميس 7
يوليو 2016
view-source:http://www.alwatneg.org/tfr/
ليست هناك تعليقات:
إرسال تعليق