وجهة نظر..
بالبلدى الفصيح .
ـــ اللى تابع
أحتفالات رأس السنة منكم فى العالم كله ومنهم العراااق.. حايتكسف من الفقر الدكر
لأحتفالاتنا فى مصر .. واللى يكسف أكتر الهبل اللى عملوه فى الهرم وأبوالهول
..وكأنه فرح (حسونه الجِعر) على فتاكات
كلينيكس !! وزير السياحة فين ؟ وماأستغلش المناسبة ليه ؟ خصوصا أن العالم كله بلا
أستثناء كان بيستعرض الأحتفالات فى دول العالم كلها ؟ بس ييظهر أن الوزير كان
بيحتفل برأس السنة فى (تانجانيقا) علشان الدنيا حر هناك،وهو ــ ياكِبد أمه ـــ مابيحبش
البرد !!!!
ـــ مرتضى
أفندى منصور بعت للكابتن محمد حسن رسالة على موبايلة فيها من المنقى خيار من شتايم
وتهديدات !! محمد حسن عمل محضر والنيابة طلبت رفع الحصانة علشان تعرف تحاسبه !!
لكن مجلس النواااام ــ كالعادة ــ عامل
ودن من طين وودن من عجين ، وبقية الجسم من بنها !! وكمان لسه لغاية دلوقت مانفذش
حكم المحكمة الدستورية العليا ( أعلى محكمة فى مصر ) .. واللى صدر من أكتر من 4
شهور بمنح الدكتور عمرو الشوبكى مقعده فى
المجلس بدلا من النائب أحمد مرتضى منصور !! ويظهر كده والله أعلم أن المجلس كله زملكاوية .. أو مرتضى ماسك سيديهات
على رئيس المجلس الموقر ،وكل الأعضاء !!.. وأنا بصراحة حاأموت وأشوف السيديهات دى
اللى راعباهم كلهم بالشكل المُقرف ده!!
ـــ أعضاء حزب
المصريين الأحرار عملوا إنقلاب على مجلس أمناء الحزب .. وعلى رأسهم نجيب ساويرس !!
علما أن عدد أعضاء الحزب لما أستلمه
الرئيس الحالى عصام خليل كان 3000عضو .. وفِضل ينزل ..و ينزل .. لغاية ماوصل للعدد
الحالى اللى رئيس الحزب بيقول عليه 1500 عضو
والحقيقة أنهم 400 عضو بس بالصلاة
ع النبى !! ده ولاحزب ( فهيمة منخّر )..
آل أيه وفاكرين نفسهم حزب بجد .. ده تلات
تربع الشعب المصرى مايعرفش أسم أى حزب واحد من ال 84 حزب سياسى فى مصر .. بلا وكسة توكسكوا كلكم ياموكوسين !!
ـــ الشفافية
اللى خاوتينا بيها ليل ونهار بتتحقق دايما
دايما دايما بقرارات النائب العام المتوالية والمستمرة فى العديد من القضايا
الهامة بــ ( حظر النشر ) ومحدش واخد باله أن حكاية الحظر دى بتزود البلبلة
والشائعات أكتر وأكتر !!!!! بس خلااااااااااااااااص !!!!!!!!!!
ـــ سى إن إن
والـ بى بى سى بعد الهجوم على ملهى ليلى فى تركيا ومقتل 40 شخص
وجرح 60 قالا باللفظ (( من الواضح أن العالم لن يستطيع القضاء على الإرهاب )) !!
داهية تاخدكوا يابُعدا !! ده المثل بيقول (( تفائلوا بالخير تجدوه )) وربنا يديكوا
ماتوقعتوه !!
ـــ مش ملاحظين
ياجماعة الخير إن العمليات الأرهابية اللى
منتشرة فى العالم كله .. ومنذ بدايتها حتى
الآن لم تتم عملية إرهابية واحدة فى اللى ماتتسماش إسرائيل !! ياترى ليه ؟
ـــ مصر فيها
3.5 مليون توكتوك .. لاليها رخص .. ولا سواقينها معاهم رخص .. وأكثرهم مسجلين خطر
!! مع أن الحكومات سمحت بدخول هذا العدد المهوووول .. ولسه بتتنيل بتسمح بدخول
المزيد كل يوم !!ّ لكن اللى يجننك بقى أنهم مش عايزين يرخصولهم !! ده طبعا غير 2
مليون وشوية مينى باص الــ ( تومناية ) .. اللى شغال فى كل شوارع مصر ، ورخصته
ملاكى .. ولا بيدفع ضرائب ، ولا تأمين ، ولا دياوللو !!!مع أن تراخيص التكاتك
والتومنيات ورخص السائقين حاتمنع كتير جدا
من الحوادث ،والعمليات الأجرامية ،
والأغتصاب .. والأهم أنها حاتجيب للبلد
فلوس زى الرز ، وأحنا فى قفا حباية رز واحدة
!! لكن تقول أيه لحكومة حاطة فى دماغها بدل العقل جزمة قديمة عايزة نص نعل
!!
ـــ تيران
وصنافير .. قضية ومشكلة يختلف عليها كل
المصريين .. والحدوتة كلها دلوقت بين
القضاء ، والحكومة ، ومجلس النواب !! مجلس
النواب بيقول أن قضايا السيادة من صميم عمله .. والقضاء بيقول إنه من صميم تخصصى
!! وبين الموقفين ناس بتنافق وتتاجر .. وناس بتستعرض .. ونواب وطنيين فعلا ..ونواب عاملين وطنيين ، ولكنهم
عكس ذلك !! وكل طرف من الأطراف يستند على الدستور اللى الكل ممرمط بيه الأرض !!
ودلوقت جايين يحتكموا للدستور !! وأيا كانت النتيجة النهائية فالآكيد أنها مش حاتعجب ناس كتير قوووى .. وناس
كتيرة برضه حاتصطاد فى المية العِكرة !! ويارب المية ماتتعكرش أكتر من كده.. لأن
اطراف كتيرة ناوية تلعب بالورقة المهمة دى!! ويارب الكل يرضى بالحكم النهائى سواء
من المحكمة أو البرلمان .. وياخوفى يابدرااااان !!
ـــ لو
بأيدى أعطى حسب رأيى الشخصى جائزة رجل العام لــ 2016 .. حاأمنحها لرجلين من أعظم الرجال فى مصر .. الأول
هو الدكتور/ جابر جاد نصار ـ رئيس جامعة
القاهرة .. والثانى هو اللواء كامل الوزير ــ رئيس الهيئة الهندسية للقوات المسلحة
.. تحية تقدير ،وإعزاز، وأحترام لكليهما .. وأكثر الله من أمثالهما .
ـــ لو عايزين
تنضفوا ودانكوا ووجدانكوا من الزبالة اللى لزقت فيهم خلال السنوات الأخيرة .. أنصحكم بسماع أغنية العظيمة نجاة الصغيرة فى
أغنيتها الجديدة ( كل الكلام ) .. أشعار الخال الأبنودى .. وألحان الموسيقار المبدع طلال .. وتوزيع وريث الفن
الجميل يحيى الموجى .. الأغنية خلتنى أسبح فى عالم من الجمال ،والمتعة.. كنت فاكر
أنهم راحوا ومش حايرجعوا تاااانى خلاص .. الله ياست نجاة .. أسعدتينا .. وأشجيتينا
.. بنحبك ،وبنشكرك على علاجنا من فيروس أغانى السبوبة اللى سدّت وداننا من سنين !!!
ـــ محمد
البرادعى .. حمدين صباحى .. أبراهيم عيسى .. التلاتة مصيبتهم مصيبة .. ( ومش
عارفها سودة ، ولا بيضا ، ولا مشجرة ) !!!.. وماينفعش أقول كلمتين عن حكايتهم
وخلاص .. أنتظروا مقالا مخصصا لهذا
الثالوث بكرة بقى وعليكوا خير .
بقلــــــــــــم
صــــــــــلاح إدريـــــــــــس
تم نشر المقال بجريدة ( الوطن ) عدد الأربعاء
4 يناير 2017
http://alwatneg.org/tfr/1469
ليست هناك تعليقات:
إرسال تعليق