عايزين نشترى كبير .!!!
مصر كلها عارفة إن الإسكندرية بيتنقسوا عن طريق البحر .. وحياتهم هى البحر .. وفخرهم بالبحر .. وفسحتهم ،
وسهراتهم ، ومتعتهم ، على البحر ,, يبقى
لما ييجى شوية بلطجية .. ورجال أعمال معاهم فلوس ..وأصلهم حرامية ،وتجار مخدرات ..
وفاسدين ومفسدين ، من المحافظة ، والأجهزة التنفيذية ، والمحليات .. وكل المحافظين اللى ترأسوا
الإسكندرية مؤخرا ..وحتى الجديد اللى مابقالوش شهرين .. كل دوول تشاركوا وتعاونوا
فى مساعدة السجانين بالبناء على شاطىء
الأسكندرية بالكامل .. وبناء أسوار عالية تحجب الرؤية للبحر .. إلا من خلال
الكازينوهات والنوادى ..التى تقام بطول الشاطىء .. علشان يهلّبوا من الأسكندرانية
والمصطافين كل اللى فى جيوبهم .. علما أن المقصودين بالسرقة والتهليب ( كالعادة
) همه الغلابة اللى متعتهم كوز درة ..
وشوية ترمس على الكورنيش .. لكن المرتاحين فى البلد فمصيفهم فى مارينا ومراسى
والساحل الشمالى كله .. ولو فيه راجل راضع من صدر أمه من المسئولين يقرب منهم ولو بنظرة .. طبعا مايقدرش لأنهم ببساطة أصحاب
البلد .. يبقى أنتوا كده مش بس بتسجنوا الأسكندرانية وضيوف الصيف المصريين الغلابة .. لكن بتموتوهم !!.
وحكاية الإسكندرية ده مجرد مثال
بسيط على اللى بيحصل فى مصر المحروسة كلها .. فرغم شغل الرقابة الإدارية الدؤوب ,,
وضبطهم فاسدين ، ومرتشين ، وولاد ستين فى
سبعين .. بصفة شبه يومية .. ورغم أنى وغيرى من مئات الكتاب والصحفيين كتبنا
مرارا وتكرارا أن فيه عصابات ساكنة ، ومعششة ، ومتغلغلة فى دواوين الحكومة
.. ومؤسسات الدولة ..وهدفهم الأساسى هو تشوية صورة السيسى ..وإظهار ضعفه ،وقِلة
حيلته ، علشان الناس تكرهه .. وبصراحة الهدف أبتدأ ينجح ويجيب نتيجة .. فالواضح أن
الفساد منتشر .. والمحسوبيات زى ماهى
واكتر .. والوسايط على وِدنه .. ومجلس النواب بأعضائه عايمين فى مية البطيخ
..والفقراء بيزيدوا كماً وكيفاً !!
ولآن الناس لاتثق فى أى مسئول غير السيسى .. فالملايين تطالبه بالتدخل
شخصيا لإصلاح كل غلط فى البلد .. سواء
كبيرا أو صغير .. ومالناش دعوة بقى بالإشاعات ، والمؤامرات ، والسقا اللى مات ..
الناس شايفاه سوبرمان .. أيوه شايفينه سوبرمان .. على الأقل فى القضايا اللى بتمس
الشارع المصرى بفقراءه ومعدميه .. لأن السيسى
بالنسبة لكل المصريين هو الكبير ..
ومفيش أمامهم إلا الكبير فى البلد علشان يلحق الفساد اللى
بدأ ينخر فى العظم.. وإن ماكانش عندنا كبير يبقى نشتريلنا كبير !!
بقلـــــــــــــــــــــم
صــــــلاح إدريـــــــــس
تم نشر المقال بجريدة ( الوطن ) عدد الجمعة 5
أكتوبر 2018
http://alwatneg.org/tfr/2801
ليست هناك تعليقات:
إرسال تعليق