الأطرش
فى الزفة !!
ــــــــــــــــــــــــــــــــــــــــــــــــــ
حد فيكوا واخد باله من اللى بيحصل
فى الأعلام المصرى .. وتغيير الشكل كله تقريبا .. وأختفاء وجوه كثيرة كانت محسوبة
على النظام ( رغم أن الأقاويل بتأكد أن كله بندبير ورغبة الدولة ).. وأول المختفين
وأهمهم (لميس الحديدى ) عن قناة سى بى سى .. اللى أسستها مع مالكها (محمد الأمين )..وهى
أهم إعلامية فى القناة ، ويمكن فى مصر كلها .
وكمان في أقل
من شهر أختفى“تامر عبد المنعم”، المعروف بولائه وقربه من الرئيس “حسني مبارك”، والذي
فوجئ بوقف برنامجه المذاع على قناة “العاصمة” .. وكمان أختفاء الأعلامى الغِلس(تامر
أمين)، مقدم برنامج ( الحياة اليوم ) ..
ده غير أختفاء المحامي (خالد أبو بكر) والإعلامية (نهاوند سري) من قناة (الحياة) برضه ..
ومن قبلهم
الإعلامي “عزمي مجاهد”، الذي سبق وأن اتهم الشعب المصري قبل غلق برنامجه والإطاحة
به بأنه “شعب يخاف مايختشيش”.
وكذلك مغادرة الإعلامي (عمرو الليثي)
قناة (الحياة) التي تولى رئاستها لمدة 6 أشهر.. وكمان وقف برنامج (العاشرة مساءً) على قناة (دريم)
الذي يقدمه المشعللاتى (وائل الأبراشي).. وبرنامجي “ملعب شريف” الذي يقدمه
الإعلامي “أحمد الشريف”، و”صح النوم” الذي يقدمه الإعلامي ((محمد الغيطى ))..على
فضائية ( إل تى سى ) .
وفي أبريل الماضي، أوقفت شبكة أون تى
فى (لبنى عسل، وعمرو خفاجي، ومعتز عبدالفتاح) ، وسبقهم في فبراير الماضي (عماد
الدين أديب)، من فضائية (الحياة) بعد قطع البث عن برنامجه، فيما غاب رئيس تحرير
“اليوم السابع”، (خالد صلاح)، عن المشهد الإعلامي بقناة (النهار) مع بداية 2018.
وكذلك
خروج الإعلامي (عمرو أديب)، من أون اى فى
نهاية أبريل الماضي، والتعاقد مع شبكة قنوات إم بى سي
بصراحة
أنا مش فاهم حاجة .. والشفافية والوضوح اللى الدولة والأعلام خاوتينا بيهم ليل
ونهار ..مالهمش أى أثر فى هذه الموضوعات .. علشان كده حزر فزر أيه الحكاية !!!! .. إما كل الأعلاميين دوول
فوق أى شفافية ووضوح .. أو ده شغل تصفية حسابات وبرضه مش عارفين مين مع مين .. أو
مين ضد مين .؟
لكن فى
كل الحالات الدولة والأعلام بيعتبرونا إما بهايم .. أو جهلة .. أو على أحسن الظروف
( غير مهمين ولامؤثرين ).. وكل اللى علينا نعمله هو أن نسمع ..ونسعد .. ونصدق كل
اللى بيتقالنا على الفضائيات.. مهما كان اللى بيتقال .. ومين ماكان اللى بيقوله ..
مش عارف ليه حاسس إننا داخلين على مرار طافح !!
وعلشان كده سايبينا عميان .. ونضرب أخماس فى
أسداس .. بس الشهادة لله همه حريصين أنهم
يكرهونا فى التليفزيون من أساسه .. علشان كده سايبيلنا أحمد موسى !!!!!!!!
والنبى ياأخوانا اللى عنده رؤية
وتفسير لكل اللى بيحصل ياريت يقولنا ويفطمنا ع
الفولة .. بدل ماأحنا عاملين زى الأطرش فى الزفة !!
بقلـــــــــــــــــــــم
صـــــــــــــــــلاح إدريــــــــــــــــس
تم نشر المقال بجريدة ( الوطن ) عدد السبت 13 أكتوبر
2018
http://alwatneg.org/tfr/2805
ليست هناك تعليقات:
إرسال تعليق