(أسياد وعبيد ).. ولاد
الناس .. وولاد البطة السودة !!
برغم أن الرئيس السيسى أتبرع قبل مايتولى
الحكم بنصف ثروته اللى ورثها عن أهله لمصر
.. ونصف مرتبه كمان .. لكن نقول أيه ..
ونعيد أيه ؟ للبُعدا اللى مافيش فى وشهم نقطة دم !! سواء من الحكومة أو مجلس النواااام الموقر .. اللى حايناقش فى جلسته العامة يوم الأحد والأثنين القادمين 26 / 27 فبراير الجارى .. المشروع المقدم من الحكومة ، بزيادة رواتب رئيس الوزراء ،والوزراء .. اللى مرتباتهم 35 ألف جنيه شهريا .. زائد
4000 جنيه (عُمى ) بدل حضور جلسات مجلس الوزراء .. وبيجتمعوا 4
مرات شهريا تساوى قيمتها 16 ألف جنيه .. فلو حطيناهم على المرتب يبقى الأجمالى المعروف
لنا 51 ألف
جنيه شهريا .. وكمان نزود مبالغ تانية
مانعرفهاش عن حضور الوزراء ونوابهم
والمحافظين للجان نوعية ، فى وزاراتهم ،ومحافظاتهم ، بياخدوا فيها بدل حضور (لُكشة حلوة كده) حتى لو ماحضروش هذه اللجان ، لأنهم ببساطة رءساء هذه اللجان
وهمه اللى مشكلينها من المنافقين ومساحين الجوخ ،والجزم ..من اللى شغالين معاهم ، وتحت رجليهم!!!!!
وعلشان
يخزوا العين قالك أيه : مجلس النوااام بالمرة كمان حايناقش زيادة المعاشات بتاعة العبيد من أصحاب المعاشات .. ويمكن الموظفين بالدولة
كمان بنسبة 10% !!! وجايبين وزيرة التضامن ،ووزير القوى العاملة للجلسة لمناقشة هذا الأمر
.. علشان تبقى محبوكة !!
وللعلم مجلس الوزراء قرر من دلوقــــــــــت
( والكلام من جوة المجلس نفسه ) أن البرلمان لو لم يعتمد هذه الزيادات حايتم رفع بدل حضور جلسات المجلس لـ 6 آلاف
جنيه ( عُمى برضه ) واللى يعرف أبويا يروح
يقوله .. واللى مش عاجبه يخبط راسه فى راس واحد تانى ..بشرط يكون مش عاجبه برضه !!!
أصل
الحكاية ياولداه أن أسيادنا الوزراء ونوابهم والمحافظين بيشتكوا من أرتفاع
الأسعار .. ومش قادرين يوفروا
لولادهم (الفيمون سيمية ..والفواجرا ..والجمبرى الجامبو .. وغيره من
الأكلات الشعبية البسيطة ) .. لاحول ولا قوة إلا بالله .
طب
وأيه أخبار العبيد اللى مش قادرين يوفروا
لولادهم العيش الحاف .. ولا الدواء .. ولا جزم جديدة ..بعد ماالجزم القديمة أتغيرلها 6 مرات نص نعل ولوزة
!!!!
وعايز
أقولكم أنى عرفت أمبارح من بعض المصادر أن ميزانية مجلس النواااام تعدت المليار
جنيه .. ودى أكبر ميزانية عرفها أى مجلس تشريعى فى مصر عبر تاريخها كله !!.. ولكن لأنى مش متأكد ، ولسه
بأدور وأبحث وأبعبش عن الحقيقة فيستحسن بلاش
نتكلم عن الموضوع ده دلوقت يمكن أحنا مفتريين
وبنظلمهم !! ونستنى لغاية مانتأكد ..ووقتها حايكون لنا كلام تانى !!
وبصراحة
أنا صعبان على البلد اللى بتتاكل من كبارها ونخبتها فى عز أزمتها الأقتصادية ،وعجز موازنتها ، وزيادة مديونياتها الخارجية والداخلية !! .. ومع
ذلك كلهم ـــ ربنا
يحرسهم ـــ ماشيين وراء المثل اللى بيقول
( لو بيت أبوك وقع .. ألحق خُدلك منه قالب ) .. والشعب كله بيقول ياريت بيت أبوكوا ده وقع فوق دماغكوا ياُبعدا
!!!
بقلــــــــــم
صـــلاح إدريــــــس
تم نشر المقال بجريدة ( الوطن ) عدد الخميس
23 فبراير 2017
http://alwatneg.org/tfr/1729
ليست هناك تعليقات:
إرسال تعليق